20 September 2023

Obadja 1

Die profesie teen Edom, die afstammelinge van Esau, die tweelingbroer van Jakob, was omdat hulle die Israeliete gespot en selfs geplunder het tydens die beleg van Jerusalem toe Nebukadnesar Israel in ballingskap weggevoer het.
Instede daarvan om hulle buurvolk te hulp te snel en hulle in hul nood tyd te help het die Edomiete eerder die mense wat van die Babeloniërs gevlug het, dood gemaak.
Hulle het ook verder gesteel en gevat van Israel nadat dit verswak was deur die Babeloniërs.

Pasop wat jy ander toewens en wat jy aan ander doen, want die gat wat jy vir ander grawe kan jyself in val.
Die Babeloniërs het Edom ook kom verwoes en weggevoer in ballingskap.
Al het die Israeliete terug gekom het die mense van Esau nooit weer as volk na hulle land terug gekom nie.

Here, help ons om die wat in nood is, die in moeilike tye, ook te help sodat mense ons sal help as dit met ons sleg gaan.
U is die Beskermer van Israel wat nie sluimer of slaap nie!