2 Mei 2022

Dagstuk
Psalm 107


Here, help ons!
Dis die gebed wat oor en oor hier herhaal word en wat ons soos Petrus wat gesink het ook moet bid.

Gister het ek met die gemeente (LWC) gepraat oor depressie, angs, uitbranding, vrees, hartseer en trauma.
Baie in ons gemeenskap lei hieraan, dis baie dieselfde en tog ook verskillende emosionele toestande.
Ek glo dat dit nie net geestelik opgelos kan word nie, maar omdat ons liggaam, siel en gees is, moet ons besef dat medikasie somtyds nodig is, sowel as berading, en ook gebed.
As ons pille kan neem vir bloeddruk kan ons ook iets  kronies gebruik vir fisiologiese foute in ons brein, wat gebeur agv stress.

Ons ander wat nie hierdeur gaan nie, word wel hierdeur geraak en moet leer hoe om meer simpatiek die situasie te hanteer.
Leer wat om te doen en hoe om te ondersteun.
“Ruk jouself reg” is nie van pas nie en help ook nie die persoon wat in die gat is, wat die Psalmdigter hier beskryf nie.
Nee, bid saam: Here help!
Help ons ook oor hoe om te help.

Here, dankie dat ons kan lees in die skrif dat hierdie seer en siekte nie net in ons tyd gebeur nie (ons het nou net woorde vir dit), maar dit was reeds in die oudste tye al daar waar mense deur die diep donkerte van depressie gegaan het.

Dankie Here dat U die kopertralies en ysterdeure van depressie afbreek!!
U is die Een wat ons koppe oplig!
Ons Geneesheer!